EXPOSICIÓN COLECTIVA ORGANIZADA POLA ASOCIACIÓN CULTURAL FOTOFORUM COMPOSTELA
A Asociación Cultural Fotoforum Compostela inaugura o vindeiro 2 de xullo, as 20:00 h, a súa última exposición colectiva da tempada 2014/15, no Palacio de Fonseca, en Santiago de Compostela. A mostra está integrada por 46 fotografías realizadas polos membros da asociación.
O título da mostra refírese a un dos aspectos máis importantes da cidade de Compostela: a Universidade. A exposición permitirá dar a coñecer parte do traballo dos fotógrafos e a súa visión moi persoal das actividades e edificios que simbolizan a vida universitaria. Trátase dun reto fotográfico moi especial, polo apoio que a Universidade imprime en todas as iniciativas do Fotoforum.
A variedade e versatilidade dos traballos producidos ao longo dun periodo de tres meses, neste tempo cada fotógrafo traballou a súa proposta, constitúe un patrimonio fotográfico representativo da constante actividade xerada polo Fotoforum e da entrega e compromiso dos seus membros.
Esta cita fotográfica remata o programa de actividades expositivas realizado pola asociación na tempada 2014/15. Para esta mostra, o Pazo de Fonseca resulta ser o espazo ideal, situado no corazón do centro histórico, un lugar emblemático de Compostela e da Universidade de Santiago. Actualmente o edificio utilízase como Biblioteca Xeral e está unido ao Colexio de San Xerome (reitorado da mesma Universidade, con fachada á Praza do Obradoiro).
A asociación quere agradecer a súa axuda e colaboración ás institucións que apoiaron desde o comezo este proxecto: o Centro Galego de Arte Contemporánea, a Universidade de Santiago , o Concello de Santiago de Compostela e a Diputación de A Coruña.
